来自 非凡集团 2018-08-29 08:54 的文章

缘分到自然有老婆!佛系男古天乐讲多无谓

  “佛系青年”、“佛系男友”等潮语最近喺中港台网络热爆,泛指凡事随缘,唔追求、唔计较慨“佛系”态度被无限上纲,出现接龙式玩法,“佛系员工”:“唔做嘢,唔上心,缘分到了,自然有粮出”;“佛系减肥”:“唔运动,唔节食,日日食到尽,缘分到,自然会瘦。”我Nuts哥觉得要数“佛系男星”,啱啱做咗影帝慨古天乐当之无愧!

  有戏拍就拍,唔恨奖、唔恨出位,几时见过渠会造新闻博见报,名店扫货揽女夜蒲?唔恨名牌、唔扮嘢,手机仲用紧八年前古董滑盖手机,收工就返屋企,做好自己,真系缘分到,自然有戏拍有奖攞。

  入行超过廿年、拍咗超过一百部电影慨古仔,因为都“贴地过”先炼成:“唔放弃、唔退缩、唔怕挨、缘分到,自然机会就嚟。”15岁开始,搬运、保安、Sales乜都做过,就连酒楼洗碗都捞埋!“洗碗都要请个靓仔,世界难捞呀!”呢句古仔感受至深,返工第一日,唔系叫渠洗碗,系洗蛇!嗰阵腥臭,成世仔都记得!

  误打误撞,帮朋友无端端做Model入行,无心插柳,够勤力、够义气乜都接,歌影视甚至广告都有代表作!“省姐捻,捻呔捻(想节能,轮胎能)”,以古式煲冬瓜将呢条“捻”胎广告“捻”足咁多年,成为中港台冧巴温国语王都未够,18年前又跳又唱《今期流行》,一首洗脑歌KO全港市民狂Loop,一听就甩唔到,咁就一世呀,大佬!

  讲拍剧,杨过、项少龙点走得甩?初踏影坛唔止做古惑仔,连“阴阳路”都要行,鬼上身都系又型又靓仔!虽则曾被话系烂片王,自从被踢爆过去十年喺广西、贵州等地起咗过百间小学、超过7千个水窖、几十间诊所后,班口痕友冇声出,你话渠为赚钱拍烂片,但用晒去起学校,低调做慈善家,唔系仲咁多嗲嘛?有情有义,古仔出晒名,唔单止接济唔少圈中人养人全家,依家仲做演艺人协会会长帮一班上年纪慨资深演员谋求医疗福利!

  古仔并非hea住等运到,“佛系”态度系表面随遇而安得嚟、对于在乎慨人同事特别积极,真系“佛都有火”!对付是非绯闻,三只字:“冇回应!”讲多无谓!但一讲电影,两眼发光!以前就话成龙系大哥,依家古仔更厉害,以渠今时今日慨知名度,大可以北上印印脚大把人仔搵,反而渠不惜工本去支持香港电影同新进导演,投资同发行慨电影唔系全商业,票房好坏,唔在乎,真系养起业界唔少人。最令人拍烂手掌,系终于攞到金像奖影帝当晚,致词时拎住张猫纸,呼吁要为香港电影打气,奖项未到手,已经谂定得奖感受要讲呢啲,想唔畀Like渠都唔得啦!

  佛得嚟有火,只限工作、家人同朋友。坚持同阿妈住,朝朝要阿妈拍醒起身返工慨古仔,N年前同黄莹分手后,一直系寡佬,最佛系一定系对感情:“唔拍拖、唔出街,冇事就留喺屋企,缘分到,自然有老婆。”